(دا لیکنه خامخا ولولئ او د پوهاوي په موخه یې له نورو سره شریکه کړئ!)

په دې وروستیو کې د ځینو احساساتي، مالومات نۀ لرونکو او تېروتو ځوانانو ترمنځ بحثونه کېږي، چې ته افغان یې او زۀ نۀ یم، احمد افغان دی او محمود نۀ دی، د دوی له ډلې څوک پر افغانیت ویاړ کوي او څوک ترې انکار کوي، راځئ! حقیقت ته یؤ ځغلنده کتنه وکړو.په افغانستان کې ټول مېشت خلک چې د افغانستان تابعیت ولري، «افغانان» بلل کېږي، که هغه د هر قوم، ژبې، نژاد او توکم لرونکی وي. په دې اړه په اساسي قانون کې یادؤنه شوې ده، چې دلته یې راوړل اړین بولم. د اساسي قانون په څلورمه ماده کې راځي: «د افغانستان ملت له پښتون، تاجک، هزاره، ازبیک، تركمن، بلوڅ، پشه يي، نورستاني، ايماق، عرب، قرغيز، قزلباش، ګوجر، براهوي او نورو قومونو څخه جوړ دى.» بیا زیاتوي: «د افغان كلمه د افغانستان د ملت پر هر فرد اطلاق كېږي.»ځینې په دې اند دي چې دغه کلمه د لوی امپراتور احمدشاه ابدالي بابا د امپراتوري په پېر کې جوړه شوه، خو د ارواښاد علامه حبیبي صاحب د څېړنو په لړ کې د دې کلمې قدامت ډېر لرغونی ښودل شوی دی، ویکېپیډیا لیکي: «عبدالحی حبیبي د خلکو او عامه ذهنيتونو د روښانولو په خاطر او د هغوی د سمې لارښوونې لپاره او همدارنګه د شک و تردید د ورکولو په خاطر د «افغان» کلمه ښه را څپړلې او ویلي یې دي چې د «افغان» کلمه (يؤ زر او اووه سوه ۱۷۰۰) کاله لرغونتوب د تاریخي اسنادو، شواهدو، او لاسوندونو په رڼا کې لري او ملي اصالت لري.»نو پایله دا چې «افغانیت» د هر هاغه چا ملي هویت دی چې د افغانستان تبعه دی/دي، دوی چې هر چېرته ځي د «افغان» په نوم پېژندل کېږي. مطلب دا چې په افغانستان کې ډېر قومونه مېشت دي، چې پورته یې یادؤنه شوې ده، د دوی ټولو قوم جلا ـ جلا دی، مګر ملت یې یؤ «افغان» دی او همدارنګه هر پښتون افغان دی، خو هر افغان پښتون نۀ دی، افغانیت یوازې پښتنو پورې محدود نۀ دی، دغه کلمه د ټولو افغانانو لپاره اطلاقېږي. درناوی!