انسانان د ځمکې اصلي مخلوقات ندي!!

امریکايي لیکوال ډاکټر ایلیس سلور (Ellis Silver) په خپل کتاب "Humans are not from Earth" (انسانان د ځمکې نه دي) کې یو حیرانوونکی نظر وړاندې کړی دی. هغه ادعا کوي چې انسان د ځمکې اصلي اوسېدونکی نه دی، بلکې په کومه بله سیاره کې پیدا شوی او وروسته د کوم علت له مخې ځمکې ته راوستل شوی دی. ډاکټر ایلیس وایي چې انسان پخوا په داسې یوه چاپېریال کې ژوند کاوه چې ډېر ارام، هوسا او د ژوند لپاره مناسب و. هلته تل د پسرلي په څېر معتدل موسم و، د لمر سختې وړانګې او الټرا وایلیټ شعاعګانې نه وې، او انسانانو ډېر نرم او هوسا ژوند درلود. د هغه په وینا، بیا له دې مخلوق څخه کومه تېروتنه وشوه او له هغه هوسا او ځانګړي ځای څخه وایستل شول او ځمکې ته راولېږدول شول. هغه ځمکه د یوه زندان یا قیدخانې سره تشبیه کوي، ځکه چې د وچې محدودې ټوټې د پراخو سمندرونو له خوا راګېر شوي دي. هغه په خپل کتاب کې څو د پام وړ ټکي هم یادوي: ۱- د ملا درد او د ځمکې جاذبه د ډاکټر ایلیس په اند، د ځمکې جاذبه (Gravity) د هغه سیارې په پرتله زیاته ده چې انسان ترې راغلی. همدې زیاتې جاذبې د انسانانو د ملا او شا د دردونو یو لامل ګرځېدلی دی. ۲- دوامدارې ناروغۍ هغه وایي چې په ځمکه کې تقریباً هر انسان له کومې نه کومې ناروغۍ سره مخ وي، خو وحشي حیوانات عموماً د انسانانو په څېر په مزمنو او دوامداره ناروغیو نه اخته کېږي. ۳- د لمر سختې وړانګې ډېری انسانان دا احساس کوي چې د اوږدې مودې لپاره د لمر تودوخه نه شي زغملی او د لمر د ضربې (Sunstroke) ښکار کېږي، خو ډېر حیوانات د اوږدې مودې لپاره په لمر کې پاتې کېږي او دومره ستونزې نه لري. ۴- د پردیسۍ احساس د هغه په وینا، ډېری انسانان کله ناکله داسې ناڅرګنده خپګان احساسوي لکه په خپل کور کې چې هم پردي وي؛ حتی که د خپلو نږدې خپلوانو ترمنځ هم ژوند کوي. ۵- د خوړو ستونزه د ځمکې نور ژوندي موجودات خپل خواړه په مستقیم ډول خوري، خو انسان باید خپل خواړه پاخه کړي، نرم یې کړي او د خوړلو لپاره بېلابېل چمتووالی ورته ونیسي. د حیرانتیا خبره دا ده چې د یوه غیرمسلم لیکوال دا نظریه انسان هغه کیسې ته متوجه کوي چې په آسماني کتابونو کې بیان شوې ده؛ یعنې د حضرت آدم علیه السلام او بي بي حوا علیها السلام د جنت څخه ځمکې ته د راتګ کیسه. ځینې خلک باور لري چې دا ډول نظریې هماغه حقیقت ته اشاره کوي چې انبیاوو علیهم السلام خپلو امتونو ته بیان کړی و. قرآن کریم هم په بېلابېلو ځایونو کې انسان ته یادونه کوي چې د دنیا ژوند د ازموینې ځای دی او دا نړۍ د انسان اصلي او تلپاتې استوګنځای نه دی، بلکې یو موقتي تمځای دی. د اعمالو له حساب وروسته به انسان خپل وروستي او ابدي منزل ته ورسېږي. تاسو په دې اړه څه فکر کوئ؟ خپله رأیه او نظر له موږ سره شریک کړئ.پښتو ګهیځ