د ویښتانو ماتېدل (Hair Breakage)

د ویښتانو ماتېدل (Hair Breakage) د ویښتانو ماتېدل هغه حالت دی چې د ویښتانو تارونه کمزوري شي، وچ او نازک شي او د ریښو له لوېدو پرته د ویښتانو په منځ یا سرونو کې ماتېږي. په دې حالت کې ویښتان خپل طبیعي نرموالی او ځلا له لاسه ورکوي او سرونه یې دوه برخې یا څېرې کېدای شي. د ویښتانو د ماتېدو عام لاملونه: ډېره تودوخه: د سشوار، ویښتانو سیدوونکي (Straightener) او ګرمو وسایلو ډېر استعمال د ویښتانو رطوبت کموي او ماتوي یې. رنګونه او کیمیاوي مواد: د ویښتانو رنګول، بلیچ، کیمیاوي سیدول او نور مواد د ویښتانو طبیعي جوړښت کمزوری کوي. وچوالی: کله چې ویښتان کافي رطوبت ونه لري، وچ، سخت او ژر ماتېدونکي کېږي. ناسمه پاملرنه: په زور کنگول، لوند ویښتان سخت برس کول، او ډېر کلک تړل هم د ویښتانو د ماتېدو سبب کېږي. نښې: د ویښتانو وچ او بې ځلا کېدل د سرونو دوه څانګې کېدل د کنگولو پر مهال د ویښتانو ماتېدل د ویښتانو نری او کمزوری کېدل د ویښتانو د ماتېدو مخنیوی او پاملرنه: 🌿 د مات شوو سرونو لږ پرې کول، ځکه مات شوی سر بېرته نه رغېږي. 🌿 د ویښتانو لپاره مناسب نرم شامپو او کنډیشنر کارول. 🌿 د تودوخې وسایل کم استعمالول. 🌿 د ویښتانو غوړول او رطوبت ساتل. 🌿 متوازن خواړه خوړل چې پروټین، ویټامینونه او منرالونه ولري. 🌿 لوند ویښتان په زور نه کنگول. یادونه: که ویښتان ډېر تویېږي، ناڅاپه کمزوري کېږي، یا د سر په پوستکي کې خارښت او زخمونه وي، د متخصص ډاکټر مشوره واخلئ، ځکه کېدای شي بل روغتیايي لامل ولري.