د ياجوج او ماجوج ديوال او ګوګل ارتهـ

د یاجوج او ماجوج دیوال او ګوګل ارتھ: عصري سپوږمکیزې نقشې او د ملحدينو پوښتنېنن سبا چې د ګوګل ارتھ (Google Earth) په وسیله د نړۍ د هرې سیمې کوڅې او ودانۍ لیدل کېدای شي، نو د ساینسي الحاد او ځینو ختیځپوهانو له لوري یوه مشهوره نیوکه مطرح کېږي. هغوی وایي: که ذوالقرنین د یاجوج او ماجوج د مخنیوي لپاره د اوسپنې او مسو دومره ستر بند جوړ کړی و، نو د نن ورځې پرمختللې سپوږمکۍ ولې هغه نه شي موندلای؟ ایا په ګوګل مپس کې د داسې لوی جوړښت نه ښکاره کېدل د دې ثبوت نه دی چې دا یوازې یوه افسانوي کیسه ده؟ په لومړي نظر دا پوښتنه منطقي ښکاري، خو کله چې د ځمکپوهنې (Geology)، د سپوږمکیزې نقشې د محدودیتونو او د قرآن کریم د الفاظو ژوره څېړنه وشي، نو څرګندېږي چې دا اعتراض له علمي او ژبني پلوه ډېر کمزوری دی. د قرآن بیان: دیوال که ډک شوی درز؟ تر ټولو لومړۍ ناسمه انګېرنه د دې جوړښت د ډول په اړه ده. ډېری خلک دا د چین د لوی دېوال په څېر یو ولاړ دیوال ګڼي، حال دا چې قرآن کریم ورته د "سد" او بیا د "ردم" کلمه کارولې ده. په عربي ژبه کې "ردم" هغه ته ویل کېږي چې یوه دره، تشه یا ژور درز د بېلابېلو پوړونو په ډکولو سره برابر او بند شي. الله تعالی فرمایي: ﴿آتُونِي زُبَرَ الْحَدِيدِ حَتَّىٰ إِذَا سَاوَىٰ بَيْنَ الصَّدَفَيْنِ قَالَ انفُخُوا حَتَّىٰ إِذَا جَعَلَهُ نَارًا قَالَ آتُونِي أُفْرِغْ عَلَيْهِ قِطْرًا﴾ (سورة الکهف: ۹۶) ژباړه: "ما ته د اوسپنې ټوټې راوړئ، تر هغه چې یې د دواړو غرونو ترمنځ تشه برابره کړه. بیا یې وویل: پوکی ووهئ (اور بل کړئ)، تر هغه چې اوسپنه سره شوه، بیا یې وویل: پړسېدلی مس راولئ چې پرې یې واچوم." د دې آیت له مخې، ذوالقرنین د دوو غرونو ترمنځ دره د اوسپنې او مسو په وسیله ډکه او د غرونو له سطحې سره یې برابره کړه. یعنې دا کوم جلا ولاړ دیوال نه و، بلکې د دوو غرونو ترمنځ د فلزي زړۀ لرونکې ډبرینه مانع وه. ځمکپوهنیز بدلونونه او د ګوګل ارتھ محدودیت که موضوع له علمي اړخه وڅېړو، ګوګل ارتھ تر ډېره د سپوږمکیو عادي انځورونه (Optical Satellite Imagery) کاروي، چې یوازې د ځمکې ظاهري سطحه ښيي. دا سیستم د ایکس رې په څېر د غرونو او ځمکې دننه نه شي لیدلای. د ځمکپوهنې له مخې، د زرګونو کلونو په اوږدو کې زلزلې، د ځمکې د تختو خوځښتونه، د غرونو ښوېدل او د خاورو او ډبرو پرله‌پسې رسوبونه رامنځته کېږي. نو زرګونه کاله پخوانی داسې جوړښت ښايي د خاورو، ډبرو او واورو تر ژورو پوړونو لاندې پټ شوی وي، او سپوږمکۍ ته یوازې د یوه عادي غره په څېر ښکاره شي. عصري لرغونپوهنه او تر ځمکې لاندې ښارونه دا ادعا چې "کوم شی چې په ګوګل ارتھ کې نه ښکاري، هغه وجود نه لري"، خپله د عصري لرغونپوهنې له موندنو سره هم سمون نه لري. په وروستیو کلونو کې څېړونکو د LiDAR (Light Detection and Ranging) ټکنالوژۍ په مرسته د ګواتیمالا په ځنګلونو کې د مایا تمدن له شپېتو زرو څخه ډېر لرغوني جوړښتونه وموندل، چې د عادي سپوږمکیو او ګوګل ارتھ په انځورونو کې نه ښکارېدل. کله چې څو سوه کلن ښارونه د ځنګلونو او خاورو لاندې دومره پټ پاتې کېدای شي، نو زرګونه کاله پخوانی فلزي بند، چې له پیل څخه د غرونو ترمنځ جوړ شوی وي، د طبیعي بدلونونو له امله تر ځمکې لاندې کېدل هېڅ د تعجب خبره نه ده. د غیبو حکمت او د الله وعده د طبیعي او ځمکپوهنیزو لاملونو تر څنګ، مسلمانان دا عقیده هم لري چې ځینې چارې د الله تعالی په ځانګړي حکمت د انسان له سترګو پټې ساتل کېږي. الله تعالی فرمایي: ﴿قَالَ هَٰذَا رَحْمَةٌ مِّن رَّبِّي فَإِذَا جَاءَ وَعْدُ رَبِّي جَعَلَهُ دَكَّاءَ وَكَانَ وَعْدُ رَبِّي حَقًّا﴾ (سورة الکهف: ۹۸) ژباړه: "ذوالقرنین وویل: دا زما د رب رحمت دی. خو کله چې زما د رب وعده راشي، هغه به دا هوار او مات کړي، او زما د رب وعده رښتینې ده." د مسلمانانو له عقیدې سره سم، د کایناتو ټول قوانین د الله تعالی تر واک لاندې دي، او هغه چې څه وغواړي، د خپل حکمت له مخې یې ترسره کوي. پایله دا خبره چې "کوم څه چې په ګوګل ارتھ کې نه ښکاري، نو وجود نه لري"، نه علمي دلیل دی او نه منطقي. قرآن کریم د ذوالقرنین د بند په اړه داسې انځور وړاندې کوي چې د ځمکپوهنې او لرغونپوهنې له هغو واقعیتونو سره ټکر نه لري، کوم چې ښيي زرګونه کلن جوړښتونه د طبیعي بدلونونو له امله د ځمکې او غرونو لاندې پټېدای شي. له همدې امله، که دا بند د سپوږمکیو په انځورونو کې نه ښکاري، دا د قرآن د ناسم والي ثبوت نه دی، بلکې د انسان د وسایلو او مشاهدې د محدودیت څرګندونه کوي. سرچینې: National Geographic (د فضايي لرغونپوهنې او LiDAR موندنې) Principles of Sedimentology and Stratigraphy تفسیر ابن کثیر (د سورة الکهف ۹۶–۹۸ آیتونو تفسیر) لسان العرب (د "ردم" او "سد" د لغوي توپیر بیان)څيړنه اوترتيب طارق اقبال سوهدروي پښتوژباړه:اصل دين ځدراڼ.