راځئ چې متلونو سره آشنا شو!

متلونه هغه پراخې مفهوم لرونکې، په وزن برابرې او لنډې ویناوې دي چې د استدلال د تائيد لپاره د خبرو اترو په ترڅ کې ويل کيږي. متلونه د ولسي ادب يوه په زړه پورې برخه تشکيلوي چې د هغو په وسيله د يوې ټولنې افکار کلتور او دودونه له يو نسل څخه بل نسل ته او له يو ولس څخه بل ولس ته د هغه ولس د عامه ذهنيت په منل شوي چوکاټ کې لېږدول کيږي.متلونه د فلکلور يوه غوره برخه تشکيلوي د استدلال له تائيد نه پرته د خبرو د ښکلا لپاره هم استعمالېږي او اغيزه يې په مقابل لوري دومره زياته وي چې ځينو مواردو کې د مطلب د ثبوت لپاره يوازې د يوه يا څو متلونو ويل کفايت کوي. په شفاهي ادب کې پښتو ژبه د متلونو له درکه يو شتمنه ژبه ده چې شمير يې زرګونو ته رسيږي. پښتانه د متلونو له استعمال سره ډېره مينه لري او زياتره وخت يې د اخلاقي نصيحتونو او ټولنيزو لارښوونو لپاره استعمالوي.