غندل څه مانا لري

«غندل» د پښتو ژبې د نږه مصدرونو ډلې یؤ مصدر دی، چې په دري ژبه کې یې «محکوم کردن » او په انګلیسي کې یې «Condemn» بولي، دغه کلمه په پښتو ژبه کې هغه وخت کارول کېږي چې یؤ عمل په ټولیزه توګه د ملامتولو، رټلو، بد ګڼلو، تنقید کولو او یا نۀ خوښولو وړ وګرځي. کله چې یؤ څوک یا حکومت پر چا ظلم یا تېری وکړي او هغه عمل د نورو له لوري بد وګڼل شي، نو هغوی یې غندي. د بېلګې په توګه، کله چې څوک پر بل چا زیاتی وکړي، نو موږ ډېر ځله وایو چې د پلانکي کس دغه عمل د غندلو وړ دي، ځینې بیا وایې: زۀ/ موږ یې په کلکو ټکو غندو. غندل کله نا کله د مظلومیت نښه هم ګڼل کېږي، د چا چې پر بل چا وس او زور بر نۀ وي، نو مظلوم یوازې د ظالم ظلمونه غندي او بس.