لګن د ولې پټ کړی دئ!

راز یو عالم وايي، چې ټول ژوند کې چا نه یم بې ځوابه کړی، غیر له یوې ښځې؛ لګن یې ټوټه کې تاو کړی په سر و. ما ترې وپوښتل: دې لګن کې څه شی دي؟ راته ویې ویل: "که دا مې ښودلی، نو پټول مې ولې؟" خدای شته چې ډېر یې خجالت کړم او دا راته د ټول ژوند لپاره عبرت شو. د کوم شي چې پټیدل حکمت وي، د څرګندیدو هڅه یې مه کوئ! د چا دویم مخ مه څرګندوئ! دویم مخ به یې ډېر خراب وي. ستاسو همدا بس دی، چې احترام مو کوي او خپل ښه مخ یې درته ښکاره کړی. موږ هر یو، یو خراب مخ لرو، هسې مو خدای پردې ساتي. کنه که سره خبر شو، زه وایم چې یو بل به هیڅ ښخ نه کړو. څومره ګناهونه چې موږ کوو، له هغو ډېرې پردې پرې الله تعالی اچوي. که د چا عیب راته معلوم هم وي، پټ ساتل یې ښه خبره ده. د قیامت په ورځ به خدای ته څه ځواب ورکوو، چې راته ووایي: ما پر خپل بنده پرده اچولې وه، تا ولې ترې پورته کړه.