نانوی او بادشاه لنډه کيسه :📚

یو تندور والا / نانوای د بادشاه دربار ته حاضر شو او عرض یې وکړ: حضور! زه غواړم د ډوډۍ بیه لوړه کړم، په دوو روپیو مې ګزاره نه کېږي، که اجازه وي پنځه روپۍ یې کړم؟ بادشاه وفرمایل: دا بیه شلو روپیو ته لوړه کړه. تندور والا د حکم سره سم د ډوډۍ بیه شل روپۍ کړه ، دا چې خلکو ولیدل، نو په ولس کې سخت ناارامي او شور جوړ شو او ټول د بادشاه دربار ته ورغلل.! بادشاه سمدستي حکم وکړ چې تندور والا حاضر کړي. بیا یې ورته وویل: زما له اجازې پرته دې ولې ډوډۍ ګرانه کړه؟ له دې وروسته به ته ډوډۍ په نیمه بیه خرڅوې، یعنې په لسو روپیو. دا چې خلکو واورېدل، نو په خوشحالۍ سره یې نعرې وهلې: بادشاه سلامت دې ژوندی وي!☑نو پایله دا شوه : خلک هم خوشحاله شول، تندور والا هم راضي شو ، او بادشاه هم بریالی وګرځېد.!