پشه يې ژبه!

دریمه برخه!! د پشه یي ژبې لهجې: د څېړونکو او ژبپوهانو د نظریاتو پر بنسټ، د پشه‌ یي ژبې لهجې په عمومي او تفصیلي ډول په لاندې پنځو برخو ویشل کېدای شي: ۱- سوېل ختیځه لهجه (د لغمان او کونړ دَرې لهجه): دا لهجه د لغمان ولایت د مرکز، الینګار او قرغېو ولسوالۍ د پشه‌ یانو، د ننګرهار ولایت د دره نور او ښیوې سیمو، د کونړ ولایت د نورګل ولسوالۍ، او همدارنګه د نورستان ولایت د نورګرام ولسوالۍ د میل درې او مشپې سیمو د پشه‌یانو ترمنځ ویل کېږي. ۲- د لغمان شمال لوېدیځه لهجه: په دې لهجه د لغمان ولایت د الیشنګ او دولت شاه ولسوالۍ پشه‌ یان، د نورستان ولایت د نورګرام او دو آب سیمو اوسېدونکي او د کابل ولایت د سروبي ولسوالۍ د اوزبین سیمې پشه‌ یان خبرې کوي. ۳- سوېل لوېدیځه لهجه (د تګاب او اله‌ سای لهجه): دا لهجه د کاپیسا ولایت د اله‌ سای، تګاب او نجراب سیمو د پشه‌ یانو ترمنځ دود ده. ۴- شمال لوېدیځه لهجه (د کوه بند او کوهستان لهجه): دغه لهجه د کاپیسا ولایت د کوه بند او کوهستان سیمو د پشه‌ یانو ترمنځ مروجه ده. ۵- شمال ختیځه لهجه (د دهګانو یا چوګني ګروپ لهجه): دا لهجه د کونړ ولایت د آریت، شماش، چلس، کوړنګل او ګنه‌ ګل سیمو، د نورستان ولایت...