ګیدړه او اوښ

ګیدړه او اوښ :یوه ورځ ګیدړه او اوښ یو ځای سیند ته ورنژدې شول. ګیدړې له اوښ څخه وپوښتل:– دا سیند څومره ژور دی؟اوښ ځواب ورکړ:– تر زنګانه پورې دی.ګیدړه د اوښ خبره ومنله، او اوبو ته یې ټوپ کړل. خو ناڅاپه اوبه تر سره پورته شوې، شاوخوا یې پښې وهلې او نږدې وه چې غرقه شي. له ډېرو هڅو وروسته بېرته راووتله او اوښ ته یې په غوسه وویل: – تا خو وې چې اوبه تر زنګانه پورې دي؟اوښ ورته وخندل او ویې ویل:– هو، زما تر زنګانه پورې !پند: کله چې له چا سره مشوره یا پرتلنه کوې، نو د مقابل لوري او د ځان شرایط، توان، او ځانګړنې حتمي په پام کې ونیسه. دا اړینه نه ده چې که څوک کوم کار کولی شي، ته هم یې هماغسې وکړې. د هر چا حالت توپیر لري ، عقل دا دی چې مشوره له ځانه سره وسنجوې.!