د امریکايي عسکرې جاسوسي ناول 33 برخه

زه او عبدالله د هغه هوار میدان له څنډې په احتیاط شاته شوو. د امیر حمزه لیدل زما ذهن ګډوډ کړی و. نه پوهېدم چې هغه په خپله خوښه د حاجي برکت له کسانو سره يو ځای شوی دی، که مجبور شوی دی. موږ د نیول کېدو له وېرې د چپې درې په یوه لرې کور کې پناه واخیسته. د کور خاوند یو خاموش او زړه سواندی سپین ږیری و. هغه زموږ د پوښتنو ځوابونه نه غوښتل، یوازې یې ویل: ـ تر هغه چې زما په کور کې یاست، خوندي یاست. دوه شپې او دوه ورځې مو هلته تېرې کړې. د ورځې به له کوره نه وتو او د شپې به مو د سیمې حالاتو ته غوږ نیوه. عبدالله به کله ناکله د حاجي برکت د پخوانیو ظلمونو کیسې کولې او زه به د هغو کسانو په فکر کې ډوب وم چې زما له امله یې ژوند له خطر سره مخ شوی و. د درېیمې ورځې سهار موږ پرېکړه وکړه چې په پټه د هغه کور حال واخلو چې پخوا یې ماته پناه راکړې وه. د ونو او کمرونو تر سیورو لاندې ورو ورو ورنږدې شوو. خو لا له لرې نه راته معلومه شوه چې څه ناوړه پېښه شوې ده. په کور کې شور نه و. انګړ تش پروت و. او د کور مخې ته د تازه خاورو دوه  قبرونه ښکاريدل. زما زړه ودرید. زه په منډه ورنږدې شوم. هلته یو ګاونډی ولاړ و. کله چې یې موږ ولیدلو، په ټیټ غږ یې وویل: ـ وسلوال کسان درې ورځې مخکې راغلل... ستاسې پوښتنه یې کوله. کله چې یې تاسې پیدا نه کړئ، د کور خاوند او د هغه زوی یې ووژل. ما نور څه وا نه اورېدل. زما پښې کمزوري شوې. په خاورو کې کېناستم. په نږدې یو کال کې مې دومره اوښکې نه وې تویې کړې. هغه بې ګناه خلک یوازې د دې لپاره وژل شوي وو چې ماته یې د یوې شپې پناه راکړې وه. عبدالله هم چوپ ولاړ و. د هغه په سترګو کې هم اوښکې راټولې شوې وې. هغه  وویل: ـ حاجي برکت به حساب  خامخا ورکوي. ما د قبرونو خواته وکتل او په زړه کې مې ژمنه وکړه چې د دې وینو پوښتنه به حتمي کېږي. خو په همدې وخت کې بل لور ته پېښې په چټکۍ روانې وې. زما د اټکل له مخې امیر حمزه توانېدلی و چې پیغام تر کیوي ورسوي. پنځه ورځې وروسته، کیوي د دوو امریکايي ښځینه عسکرو او دوو افغان پولیسو په ملتیا د ګرځندويانو په نوم منډول جهیل ته رارسېدلې وه. هغوی د  ګرځندویانو په څېر جامې اغوستې وې او ځان یې دخارجي  خلکو پشان ښوده. خو د سفر اصلي هدف بل څه و. دوی راغلي وو چې ما او عبدالله پیدا کړي. او تر ټولو مهمه دا چې دحاجی برکت د نیولو لپاره یو داسې پلان جوړ کړي چې د تېښتې هېڅ لاره ورته پاتې نه شي. خو هغوی نه پوهېدل چې حاجي برکت هم د خپلو جاسوسانو له لارې د دوی د راتګ بوی اخیستی و... او د منډول د جهیل پر غاړه د یوې خطرناکې مقابلې شېبې رانږدې شوې وې. کيوی او ملګرې يې په ډيره مينه د منډول جهیل ته رسېدلې وې. چې،  لارښوونکی يې امير حمزه و،کله چې دوي د جهیل تر څنګ په ميله بوښتې وې،د حاجی برکت کسانو پرې بريد کړی و. پوليسو ورسره مقاومت وکړ چې په پايله کې يو پوليس خپل ژوند د لاسه ورکړ. بلاخره د يو ساعت جګړې وروسته د حاجی برکت کسانو لاس ته ولويده... نور بيا... بله برخه کې کيوی او ملګرې يې د حاجی برکت دکسانو لخوا سم جنسي تيري سره مخ کيږي