د مخباراتي شبکې کارمند یو بله نادره👋

د مخباراتي شبکې کارمند یو بله نادره👋د تیر پوسټ په ادامه.... د اتصالات په شبکې کې د دندې پر محال یوه مشتری زنګ راته وواهه. د غږ له اندازې داسې معلومېده چې شاوخوا ١٣ یا ١٤ کلن هلک به وي. هغه وویل: "زما د سیمکارټ پیسې ورکېږي. مهرباني وکړئ وګورئ چې ولې مې بیلانس کمېږي." ما یې چې سیمکارټ چیک کړ، نو معلومه شوه چې یو د خدماتي کڅوړو څخه ورته فعال شوی دی. ما ورته وویل: "ستاسې په سیمکارټ کې یو خدمت فعال دی، چې هره ورځ ٧ افغانۍ ستاسې د بیلانس څخه کميږي." هغه راغبرګه کړه چې څه وخت فعال شوی دی؟ ما ورته وویل چې د دوشنبې په ورځ. هغه راته وویل چې غوږ شه: "زه د مدرسې طالب یم. په مدرسه کې د موبایل د استعمال اجازه نه لرم. نو ځکه هره پنجشنبه چې کور ته راشم، نو موبایل کاروم، او کله چې بېرته د شنبې په ورځ ځم نو یې په خپل شخصي بکس کې قلف کوم. زیاته یې کړه چې ما د تیرې پنجشنبې په ورځ ٥٠ افغانۍ کریډیټ اچولې وې. یو ملګري ته مې زنګ وکړ ٣ افغانۍ مې مصرف کړې. اوس چې ګورم ٢٥ افغانۍ پاتې دي. او بله دا چې د دوشنبې په ورځ خو زما موبایل خاموش وو او په بکس کې قلف وو. نو دا خدمت چا فعال کړی دی؟ ما خو نه دی فعال کړی." د هغې دې پوښتنې بیخي بې ځوابه کړم. د هغه خبرې زما لپاره ډېرې حیرانوونکې وې. تر دې وخته مې باور درلود چې دا ډول خدمات یوازې د مشتریانو له خوا فعالیږي، شرکت یې په خپله نه فعالوي. خو د دې هلک د خبرو له اورېدو او د هغې د قضیي د څیړنې وروسته (ما CDR چیک کړ. څه چې ویلي وو زره دروغ په کې نه ول) زه مطمئن شوم چې د اتصالات کمپنۍ ښه شاخداره غلا کوي.زموږ په دې معصومو هیوادوالو دې رب تعالی ورحمیږي. چې میلیاردران ورته غله وي، نو نور به د چا ګیله وکړو!؟